حفلة كريسمس لا تنسى ،،،،،،،نادي المنصور سنة ١٩٧٣ !!!!
سيف الدين الألوسي
حفلة كريسمس لا تنسى ،،،،،،،نادي المنصور سنة ١٩٧٣ !!!!
هذه المقالة ،،من ايام الكعدة والعشة والمشروب تكلف دينار ونص للنفر !! وباكيت الرثمن بربع دينار !!!!
في حفلات الكريسمس بالنوادي سابقا ،، تكون مختصرة على الاعضاء فقط ودون قبول الضيوف ، واصغر من حفلات راس السنة !!!
وتكون عادة بعد حفلة وقت العصر للاطفال ولحد ١٢ سنة وحيث يحضرها بابانوئيل او سانتا كلوز باللاتينية ، ويوزع بعض الهدايا والالعاب للاطفال ومنها وجوه كارتونية تلبس على الاذان او خشم كبير غير قابل للتنگبر ،، او شفقات كارتونية ،، الخ ،، وتتخللها العاب سحرية وببسي وچبس ولفات مال همبرغر وروست ولسان وجبن !!!
وبالطلعة يقف حميد وهو معاون مدير النادي الف رحمة على روحه ،، ليبيع من جامخانته الصغيرة بباب بناية النادي ، الفروت كامز والمارس والكيت كات !! والسمارتيز البوري ، والجكاير مال جهال !! كلنا مررنا بهذا الدور وفي مدارسنا من الروضة الى الابتدائية ،، ومدرسة مدام عادل مشهورة باحتفالاتها بالكرسمس وسانتا كلوزها المرحومة هيام ابنة مدام عادل الله يرحمها ،، وبدرجة اقل التأسيسية ومديرتها المرحومة صوفي مبارك ،، وهذه الحفلات منذ الاربعينيات واستمرت لحد نهاية السبعينيات .
( نلاحظ ان مديرات الاول ومربياته كلهم من اصل لبناني ولهذا طلعت الاجيال من ربعنا تحب كيف وونسة !!! ) .
نرجع لسالفتنه ،، اتفقنا نحن مجموعة من طلاب كلية بغداد مسيحيين ومسلمين الاعضاء بالنادي وكنا ببداية السادس اعدادي ان نحتفل بهذه المناسبة في نادي المنصور ،، الحفلة تبدأ ساعة عشرة وتحييها فرقة شيراك الغربية والمرحوم صاحب شراد وراقصة والمرحومة سعاد عبد الله وكانت في بداياتها الفنية !!! ،، واحنه من ساعة سبعة متواجدين ودخلنا للقاعة ، لنرى الميز المحجوز لنا بخانة الشوادي بچعب القاعة بالرازونة اللي يم الكراج والهوه يدعبل علينه من الشباك !!! گلنه ميخالف !!!
بدأ الاعضاء بالقدوم والميز اللي بصفنا كبير لاكثر من ثلاثين شخصا كاعدين اعضاء مشكلين ،، تجار وضباط عتك وطبيبين ،،، احدهم برتبة مقدم او عقيد ركن متقاعد خريج كمبرلي ، واعتقد من المغضوب عليهم بهذاك الوكت وذهب الى دار حقه بداية التسعينيات ،، الف رحمة عليه ، زوجته لابسه بالطو او قبوط فرو موديل ١٩٦٢ بس بلية تريشة !! اكيد جايبته من لندن وهي لابسته بآب اللهاب من رجعت بالطيارة ، و على اساس هي جايه من لندن الباردة،، وحتى لا تدفع كمرك !!!!
(لم يتخلف احد من ربعنا) !!!!!!!!!!!! و اصدقاء أخرين غير مقيمين على ميزنا ،، يأتون للجلوس ترانزيت للط بطل فريدة او امستل ، وشرب جكارة !!
ب ي الوردة وهو من اروع الاصدقاء الصدك بحياتي ،، وكان الاول على شعبتنا شعبة دي ، وقبل ان ينتقل لشعبة اي او الالف في هذه السنة ، سنة البكلوريا ،، ب لا يدخن او يدخن بالمناسبات في ذلك الوقت ولا يشرب مطلقا ولليوم ،، مثل حجي ف ق !!
ولكنهم من اروع الاصدقاء والاخوة ومنذ الطفولة ولليوم ! والكعدة لا تحلى بلياهم !!
ن ح وانا. لحينا على ب بجداحة لتوريث جكايرنا الروثمن ( دهن الزردوم ) ،، وبعد ان بدأت فرقة شيراك بعزف اغنية عاطفية مال الاول ،، ب گاعد بظهر ام البالطو الفرو اللي طاويته على كرسيها وهي دتلعب دانص ويه رجلها !! ومد ايده والجداحة ليورث لنا و بدون ان ينتبه ،لتگب ريحة العطاب !! احترگ القبوط الفرو !!! وصارت بيه حفرة بگد الدرهم ،، المهم فضت سلامات ،، وب طلعت عليه الگعده زقنبوت ،، الى ان رجعت المره وكأن شيئا لم يكن !! كتله خلليني اكعد محلك ،، اذا سألتني المره اگلها هذا قبوطچ معثوث ،، ليش مخاله نفتالين بالكنتور وافضها !!!
الحمد لله طلعوا من الحفلة قبلنا وفضت سلامات ،، ثم اتي ملك الاناقة المرحوم المتواضع ذو الدم الخفيف المطرب صاحب شراد باغنيته الشهيرة و انا سودة مثل البيتنجان وخدودها فرط الرمان وبعد دخول سانتا كلوز للحفلة لييوزع صافورات وشفقات كرتونية،،
وليشعلون الحفلة المرحوم صاحب شراد والمرحومة سعاد والراقصة ،، وبعد طيران الجميع على ارتفاعات عالية وعلى طائرات الدمبل والبلاك والاولد پار والفريدة والامستل ، وحيث تبدأ نحوسيات ونق النسوان براس رياجيلهم ،، وكافي تشرب ،، گمت تخربط !!!!! عابت شكل هل الراقصة ، شلون نمونة ، وچ الشادي !! متستحي كمت تروط !! حتى تطلع الكعده زقنبوت ومن ثم يسحبوهم الى بيوتهم مثل سحب الفصايل من ساحة العرضات بعد انتهاء التدريب ،، وبعد ضرب الاسكلوب الزين لو التكة والكص والكباب !!
احنه عزلنه ويه شيراك ساعة خمسة الصبح وعلى اغنية باي باي الارمنية المحورة !! ورحنا للمصبغة ناكل كاهي بهل البرد !!
ما ادري ليش تذكرت هاي الكعدة ونحن في الصيف وانا باميركا اليوم ، وانا ارى بعض ربعي ممن كانوا معي وانا مثلهم ملتهين بعمل الفحوصات الطبية وفحوصات القلب والايكو والتحاليل ،، وتحليل الادرار المليان مونة مال الاول وقبل زمن الكورونا !!
ونرجع اليوم ونگول ،، هل كنا نحن في حلم وصحينا على كابوس ، هل كنا من الفايكنغ واصبحنا من الهكسوس!! ، او كنا في عالم اخر لا يمت لعالم وشكولات اليوم بأي صلة ،، لا وطنية ولا جينية ،،، وعيش وشوف!.
