\ شعر مناسب الى كل من خان وطنه وجاء مع المحتلين يكل أنواعهم وعمائمهم وبهائمهم ولكن السؤال شنو الفائدة إذا هم ماعندهم غير

شعر مناسب الى كل من خان وطنه وجاء مع المحتلين يكل أنواعهم وعمائمهم وبهائمهم ولكن السؤال شنو الفائدة إذا هم ماعندهم غيرة ووطنيه ويعتقدون أن كل الإنتقادات لهم هي غلط وأن سرقاتهم هي تُعتبر زكاه وأنهم إحق بالكراسي وكلشي اوكلأشي. السؤال مالعمل الواقعي لكنس هذه
الزباله من تاريخ العراق المرير؟؟ مالعمل الواقعي وليس فقط بالأشعار؟؟ مالعمل؟؟؟

رسالة مفتوحة لمجلس النواب
عليمن هالصلا والصوم يــــا نواب
داعش هم تصلي صوب ذاك الباب
بــاب البيت الابيض لاسود الچذاب فروخ بريمر طلعتوا يا لوتيه
تلاميــذك (بريمر) خذهم لبيتك
حرامية طلعوا مثلك على نيتك
شيعة وسنه كلهــا تصيح لبيتك من يوم رصدت الهم الماليه
بــــوگـــــو الف ست آلاف لا خمسين
لاچن مـــو معيشـــــة شعبي المسچين
چذب هذي الصلا والصوم باسم الدين صدگ كلمن يسميكم حرامية
محروسين بالشيطـــان والقانون
عمايم والجماجم خالية تحكمون
دكتورا چذب متخرج الملعون من سوگ المريدي والضلوعية
تحت هاي العمايم والعگل جاموس
وخربتو اســـاس الدين والنــاموس
نهبتوا بحجة الايمان كومة فلوس گولولي منو رب النهيبيه
عشر سنين وتلاثـــــــه حكمتونه
وين الكهربـــــه والمـــاي دلونه
وين الامن والتعليم راوونـــــــه ميدوم الحكم بيد الشلاتية

نايبنـــــا النذل هـــــــالساقط الغيرة
على حساب الشعب صلح بواسيره
ويصيف بعدهـــــا خــــارج الديره هاي اعمال انجاس المچاريه
عليمن هالحجــــــاب النايبه تلبس
ذهب قبقابهـــــا والماس بالمحبس
راگوصات صيرن اشرف واونس من بوگ الشعب ويه الكلكجيه
مـا شفنه ديـــانــــه تعبد الــدولار
غير المجلس العدنــه عبيد اشرار
وعظهم : كلنـا بالدنيه نجي خطار ما شفنه ضيوف تبوگ راعيهه
لكل واحد حمايه والشعب مغدور
ما گلتوا الشعب فد يوم راح يثور
واحدكم نسر باچر فرخ عصفور يطير جناحه جنسيه انگريزيه
شدينـــه العزم ترجع حگوگ النـــــاس
حضروا روسكم ، حضر شعبنـا الفاس
حراميـه وحكمتــوا معممين الراس خوش كلاو باسم الدمقراطية